Uttara Kannada | ಆಟೋಗಳಿಗೆ CNG ಸಂಕಷ್ಟ 35 ಚಾಲಕರಿಂದ ಗ್ರಾಹಕ ನ್ಯಾಯಾಲಯದಲ್ಲಿ ಮೊಕದ್ದಮೆ ದಾಖಲ.
ಕಾರವಾರ: ಉತ್ತರ ಕನ್ನಡ ಜಿಲ್ಲೆಯಲ್ಲಿ ಆಟೋ ರಿಕ್ಷಾ ಚಾಲಕರಿಗೆ CNG ಇಂಧನದ ಸಮಸ್ಯೆ ತೀವ್ರವಾಗಿದ್ದು, ಕೆಲವು ಕಡೆ CNG ಬದಲು CBG (Compressed Bio-Gas) ಇಂಧನ ವನ್ನು ಬಲವಂತವಾಗಿ ನೀಡಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಇದರಿಂದ ಆಟೋ ಚಾಲಕರು ಸಂಕಷ್ಟಕ್ಕೆ ಸಿಲುಕಿದ್ದು, ಇದೀಗ ವಿಷಯ ಗ್ರಾಹಕರ ನ್ಯಾಯಾಲಯದ ಮೆಟ್ಟಿಲೇರಿದೆ.https://kannadavani.news/mundgod-water-crisis-villagers-no-bath-for-a-week-ramapura-colony/
ಜಿಲ್ಲೆಯಲ್ಲಿ ಒಟ್ಟು ಆರು CNG ಇಂಧನ ಬಂಕ್ಗಳಿವೆ.ಇವುಗಳಲ್ಲಿ ಮುಂಡಗೋಡು ಮತ್ತು ಶಿರಸಿ ಭಾಗದ ಪಂಪ್ಗಳಲ್ಲಿ CNG ಬದಲಿಗೆ CBG ಯನ್ನು ಬಲವಂತವಾಗಿ ನೀಡಲಾಗುತ್ತಿದೆ ಎಂಬುದು ಅವರ ಪ್ರಮುಖ ಆರೋಪವಾಗಿದೆ.
CNG ಬದಲು CBG: ಆಟೋ ಚಾಲಕರ ಆಕ್ಷೇಪ
CNG ಸಿಗದ ಹಿನ್ನೆಲೆಯಲ್ಲಿ ಪರ್ಯಾಯ ಇಂಧನವಾಗಿ CBG ಬಳಸುವ ಅನಿವಾರ್ಯತೆ ಎದುರಾಗಿದೆ ಎಂದು ಆಟೋ ಚಾಲಕರು ಹೇಳುತ್ತಿದ್ದಾರೆ. CNGಗೆ ಹೋಲಿಸಿದರೆ CBG ಬಳಕೆಯಿಂದ ಮೈಲೇಜ್ ಕಡಿಮೆಯಾಗುತ್ತಿದೆ ಹಾಗೂ ವಾಹನಗಳ ಎಂಜಿನ್ಗಳಲ್ಲಿ ಸಮಸ್ಯೆ ಉಂಟಾಗುತ್ತಿದೆ ಎಂದು ಕೆಲ ಚಾಲಕರು ಆರೋಪಿಸಿದ್ದಾರೆ.
CBG ಬಳಕೆಯಿಂದ ವಾಹನಗಳ ನಿರ್ವಹಣಾ ವೆಚ್ಚ ಹೆಚ್ಚಾಗಿದ್ದು, ರಿಪೇರಿಗೆ ಹೆಚ್ಚಿನ ಹಣ ಖರ್ಚಾಗುತ್ತಿದೆ ಎಂಬುದು ಚಾಲಕರ ಅಳಲು.
35 ಆಟೋ ಚಾಲಕರಿಂದ ಗ್ರಾಹಕರ ನ್ಯಾಯಾಲಯದ ಮೊರೆ
ಸಮಸ್ಯೆ ಕುರಿತು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮನವಿ ಮಾಡಿದರೂ ಸೂಕ್ತ ಸ್ಪಂದನೆ ಸಿಗಲಿಲ್ಲ ಎಂದು ಆರೋಪಿಸಿರುವ ಮುಂಡಗೋಡು ಹಾಗೂ ಶಿರಸಿ ಭಾಗದ 35 ಆಟೋ ಚಾಲಕರು ಇದೀಗ ಗ್ರಾಹಕರ ನ್ಯಾಯಾಲಯದ ಮೊರೆ ಹೋಗಿದ್ದಾರೆ.
ಪ್ರತಿ ಚಾಲಕರಿಗೆ ತಲಾ ₹1 ಲಕ್ಷ ಪರಿಹಾರ ನೀಡುವಂತೆ ಕೋರಿ CNG ಬಂಕ್ಗಳ ವಿರುದ್ಧ ದಾವೆ ಹೂಡಿರುವುದಾಗಿ ತಿಳಿಸಿದ್ದಾರೆ.
CNG ಹಾಕಿಸಿಕೊಳ್ಳಲು 15ರಿಂದ 25 ಕಿ.ಮೀ. ಪ್ರಯಾಣ!
ಉತ್ತರ ಕನ್ನಡ ಜಿಲ್ಲೆಯಲ್ಲಿ ಸುಮಾರು 7 ಸಾವಿರ ಆಟೋ ರಿಕ್ಷಾಗಳಿವೆ ಎಂದು ಚಾಲಕರ ಸಂಘದವರು ಹೇಳುತ್ತಿದ್ದಾರೆ. ಆಟೋಗಳಿಗೆ ನಗರ ಪ್ರದೇಶದಲ್ಲಿ 7 ಕಿ.ಮೀ. ಹಾಗೂ ಗ್ರಾಮೀಣ ಪ್ರದೇಶದಲ್ಲಿ 3 ಕಿ.ಮೀ. ವ್ಯಾಪ್ತಿಯಲ್ಲಿ ಸಂಚರಿಸಲು ಮಾತ್ರ ಪರವಾನಗಿ ಇದೆ ಎಂದು ಅವರು ತಿಳಿಸಿದ್ದಾರೆ.
ಆದರೆ CNG ತುಂಬಿಸಿಕೊಳ್ಳಲು ಕೆಲ ಆಟೋ ಚಾಲಕರು 15ರಿಂದ 25 ಕಿ.ಮೀ. ದೂರ ಪ್ರಯಾಣಿಸಬೇಕಾದ ಪರಿಸ್ಥಿತಿ ಇದೆ ಎನ್ನುವುದು ಅವರ ಆರೋಪ.
Rapid Bike ಸೇವೆಯೂ ಮತ್ತೊಂದು ಸವಾಲು
CNG ಸಮಸ್ಯೆಯ ಜೊತೆಗೆ Rapid Bike ಸೇವೆ ಆರಂಭವಾಗಿರುವುದು ಕೂಡ ಆಟೋ ಚಾಲಕರಿಗೆ ಮತ್ತೊಂದು ಸವಾಲಾಗಿದೆ ಎಂದು ಸಂಘದವರು ಹೇಳಿದ್ದಾರೆ.
ನಗರ ಪ್ರದೇಶ ಹಾಗೂ ಪ್ರವಾಸಿ ತಾಣಗಳಲ್ಲಿ ಗ್ರಾಹಕರು ಆಟೋಗಳ ಬದಲಿಗೆ ಬೈಕ್ ಸೇವೆ ಬಳಸುತ್ತಿರುವುದರಿಂದ ಆಟೋ ಚಾಲಕರ ಆದಾಯದ ಮೇಲೂ ಪರಿಣಾಮ ಬೀರುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.
ಸಂಚಾರ ಮಿತಿ ಹೆಚ್ಚಿಸಲು ಆಗ್ರಹ
ಆಟೋಗಳಿಗೆ ವಿಧಿಸಿರುವ ಸಂಚಾರ ಮಿತಿಯನ್ನು ಹೆಚ್ಚಿಸಬೇಕು, ಜಿಲ್ಲೆಯಲ್ಲಿ ಸಮರ್ಪಕವಾಗಿ CNG ಲಭ್ಯವಾಗುವಂತೆ ಕ್ರಮ ಕೈಗೊಳ್ಳಬೇಕು ಹಾಗೂ CNG ಬದಲಿಗೆ ಬೇರೆ ಇಂಧನ ನೀಡುವ ಕುರಿತು ಸ್ಪಷ್ಟತೆ ನೀಡಬೇಕು ಎಂಬುದು ಆಟೋ ಚಾಲಕರ ಪ್ರಮುಖ ಆಗ್ರಹವಾಗಿದೆ.
ಒಟ್ಟಿನಲ್ಲಿ CNG ಕೊರತೆ, CBG ಬಳಕೆಯ ವಿವಾದ ಮತ್ತು Rapid Bike ಸೇವೆ
ಈ ಮೂರು ವಿಚಾರಗಳು ಉತ್ತರ ಕನ್ನಡ ಜಿಲ್ಲೆಯ ಆಟೋ ಚಾಲಕರಿಗೆ ಸದ್ಯ ದೊಡ್ಡ ಸವಾಲಾಗಿ ಪರಿಣಮಿಸಿವೆ. ತಮ್ಮ ಸಮಸ್ಯೆಗಳಿಗೆ ಪರಿಹಾರಕ್ಕಾಗಿ ಇದೀಗ ಚಾಲಕರು ಗ್ರಾಹಕರ ನ್ಯಾಯಾಲಯದ ಮೊರೆ ಹೋಗಿದ್ದು, ಪ್ರಕರಣದ ಮುಂದಿನ ಬೆಳವಣಿಗೆ ಕುತೂಹಲ ಮೂಡಿಸಿದೆ.
